ژیاننامە

کامیل ئەحمەدی، دەرچووی بواری مرۆڤناسیی (خەڵکناسیی) کۆمەڵایەتییە کە لێکۆڵینەوە لە سەر بابەتەگەلی وەکوو فەرهەنگی خۆجێیی، دابونەریتە زیانبەخشەکان، مافەکانی منداڵان، ڕەگەزێتی و مافی کەمینەکان ئەنجام دەدا و چۆنیەتیی لیکۆڵینەوەکانی زیاتر بە شێوەی مەیدانی و گروپییە؛ ناوبراو ساڵی ١٣٥١ی هەتاوی (۱۹۷۲) لە بنەماڵەیەکی کورد لە ڕۆژهەڵاتی کوردستان له شاری فرەفەرهەنگی نەغەدە لەدایک بووە. کامیل ئەحمەدی لە ماوەی پێنج ساڵ خوێندنی سەرەتایی لە کوردستان؛ سێ سیستەمی پەروەردەی پاشایەتی، سیستەمی پەروەردەی کوردی و سیستەمی پەروەردەی کۆماری ئیسلامی تاقی کردۆتەوە.

دەربەدەری و ژیانی ماڵ بەکۆڵ و ڕاوەدوونانی بەردەوام بەشێکی تایبەتی سەرەتای ژیان و سەردەمی منداڵی کامیل ئەحمەدین و تا ئەو کاتەی دەگاتە تەمەنی لاوی کۆمەڵێک ڕووداوی جۆراوجۆر لە زێدەکەی و ناوچەکانی دەوروبەر دێنە ئاراوە و هەر ئەمەش دەبێتە هۆی ژیانێکی پڕ لە کەند و لەند و هەوراز و نشێوی زۆر دەکەوێتە ژیانییەوە. کۆمەڵێک تایبەتمەندی و زنجیرە ڕووداوە نائاساییەکانی ئەو سەردەمە بریتین لە: ژیان و گەشەکردن لە ناوچەی سیاسی و ئاڵۆزی نەغەدە کە خاڵی دەسپێکی زۆر شەڕ و پێکدادانی خوێناوی بووە، تێپەڕاندنی ژیان لە ئاقارێکی فرەکەلتوور و فرەئایینزا، شۆڕشی گەلانی ئێران لە ساڵی 1979ی زایینی، شەڕی ناو شاری نەغەدە و کوشتوبڕی ناوخۆیی کوردستان، شەڕی هەشت ساڵەی ئێران و عێراق، کێشەوگرفتی تایبەت بە ناوچەکانی سەرسنوور، بوردومانی بەردەوام و ئاوارەبوون و ماڵ بەکۆڵبوونی بەردەوام بەمەبەستی دۆزینەوەی شوێنێکی هێمن بۆ ژیان، داخرانی ناوبەناوی قوتابخانەکان. بەشێکی زۆری سەردەمی منداڵی و مێرمنداڵی کامیل ئەحمەدی لە وەها هەلومەرجێکدا تێدەپەڕێ و لە هەڕەتی لاویشدا جارێک دەستبەسەر و بەند دەکرێت. هەرواز و نشێو بەردەوام دەبێ و لە ناوەڕاستەکانی ژیانیدا جارێکی دیکە دەستبەسەر دەکرێ و بەتاوانی کۆمەڵێک توێژینەوە لەسەر خەسارە کۆمەڵایەتییەکان دەکەوێتە بەندیخانەی ئێڤین؛ دواجار ناچار دەبێ بۆ جارێکی دیکە وڵات بەجێ بهێڵێ.