بە کاتی گریانی پیاوان

کتێبی “بە کاتی گریانی پیاوان؛ توێژینەوەیەک سەبارەت بە توندوتیژی دژی ڕەگەزی نێر لە کۆمەڵگەی ئێراندا” چاپ و بڵاوکرایەوە

کتێبی “بە کاتی گریانی پیاوان…” لە نووسینی کامیل ئەحمەدی و هاوکارانی وەک نوێترین بەرهەمی بواری لێکۆڵینەوەیی ڕەگەز و جێندەر چاپ و بڵاو کرایەوە. ئەم لێکۆڵینەوه به ڕوانگەیەکی نوێ و مێتۆدی مەیدانی، یەکیک لە لایەنە پەردەپۆشکراوەکانی توندوتیژی جێندەری دەخاته ڕوو، کە بریتیە لە ئەزموون و خەسارە بەرکەوتووەکانی پیاوان و کوڕان له بەڕامبەر پێکهاتهی کۆمەڵایەتی و کلێشەکانی پیاویەتی.

دیارە تاوتویکردنی ئەم پرسە قەت بە مانای بێ بایەخکردنی توندوتیژی دژی ژنان نییە. لە ڕوانگەی ئەم توێژینەوەیەوە، هێشتا توندوتیژی دژی ژنان بابەتێکی جیددی و حاشا هەڵنەگرە کە پێویستی بە گرنگیدان و کردەوەی بەردەوام هەیە. بە واتایەکی تر ئامانجی ئەم توێژینەوەیە دژبەری یان کێبڕکێی نێوان ئازارەکان نییە؛ بەڵکو فراوانکردنی بواری دیدمانە بەرەو دیاردەی توندوتیژی. تێگەیشتن لە توندوتیژی کاتێک تەواوتر دەبێت کە هەموو دەنگەکان بە ژن و پیاو و کچ و کوڕ و تاک و گروپی خاوەن ئاراستە و شوناسی جۆراوجۆرەوە ببینرێن و ببیسترێن.

” بە کاتی گریانی پیاوان …” بانگهێشتێکە بۆ تێگەیشتنێکی گشتگیرتر لە دادپەروەری و ئاسایش؛ ئەو جێگایەی کە ژیانێکی دوور لە توندوتیژی مافی هەموو مرۆڤەکانە. چاپکراوی ئەم بەرهەمە کە ئێستا لەبەردەستی خوێنەران و ئارەزوومەندانی توێژینەوەی جێندەر و کۆمەڵناسیی ڕەگەزە، لەلایەن چاپخانەی ئاڤای بووف ڕەوانەی بازاڕی کتێب کراوە.

هەروەها وەشانی PDF و وەشانی دەنگی کتێبەکە بەردەستە و لە ڕێگەی ماڵپەڕی تایبەتی نووسەرەوە دەتوانن دایبگرن و بیخوێننەوە.. لینکی دابەزاندنی کتێبەکە :

لینکی بەرگی PDF کوردی توێژینەوه